2025-02-03
سەرۆکی زانکۆی سۆران پێشوازی لە “موحەممەد ساڵح” پاڵەوانی نێودەوڵەتی کرد
رۆژی دووشەممە ۳ـی شوباتی ۲۰۲٥، پ. ی. د. شێروان شەریف قورتاس سەرۆکی زانکۆی سۆران، پێشوازیکرد لە موحەممەد ساڵح، یاریزانی هونەرە جەنگیەکان ناسراو بە MMAـی نێودەوڵەتی.
لە دانیشتنێکدا، سەرۆکی زانکۆ بەخێرهاتنی موحەممەدی پاڵەوانی کرد و پیرۆزبای خۆی زانکۆی سۆرانی ئاراستەی ناوبراوکرد، بە بۆنەی سەرکەوتن و بەدەست هێنانی چەندین نازناوی نێودەوڵەتی، لە پاڵەوانیەتییەکانی تایبەت بە هونەرە جەنگیەکان، هەروەها سەرۆکی زانکۆ، پەسنی دەستکەوتەکانی موحەممەدی کرد، کە لە ماوەی بەشداریکردنی لە چالاکییە نێودەوڵەتیەکان بەدەستی هێناون و جەختی لە هەموو پشگیریەکی زانکۆی سۆران بۆ ناوبراو کردەوە.
لە بەرامبەردا، موحەممەد ساڵح، سوپاسی سەرۆکی زانکۆی سۆرانی کرد بۆ ئەو پێشوازییە گەرمەی کە لێیکرا، جەختی کردەوە کە بەردەوامدەبێت لەسەر پەرەدان بە تواناکانی، تاکو بتوانێت بە بەردەوامی بەشداری لە پاڵەوانیەتییە نێودەوڵەتییەکان بکات و پلەی باش بەدەستبهێنێت.
لە کۆتاییدا، پ. ی. د. شێروان شەریف قورتاس، سەرۆکی زانکۆی سۆران، قەڵغانى ڕێزلێنانی بەخشی بە موحەممەد ساڵح، وەک پشتیوانیەک بۆ موحەممەد و گشت وەرزشوانان و کەسانی خاوەن بەهرە و توانا.
جێی ئاماژەپێدانە، موحەممەد ساڵح، خەڵکی ئیدارەی سەربەخۆی سۆرانە، لە چەندین پاڵەوانێیەتی نێودەوڵەتی تایبەت بە هونەرە جەنگییەکان(MMA) بەشداریکردووە و سەرکەوتنی گەورەی بەدەستهێناوە، هەروەها خاوەن ڕیکۆردی جیهانییە، بە بەدەستهێنانی ١٧ پاڵەوانیەتی لە تەمەنی ٢٢ ساڵی وەک بچوکترین یاریزان لە سەر ئاستی جیهان. لە دواین پاڵەوانێیەتیش کە لە ١٧ـی کانووی دووەمی ۲۰۲٥، لە ووڵاتی ئیماڕات بەڕێوەچوو، موحەممەد ساڵح توانی پلەی یەکەمی پاڵەوانیەتییەکە بەدەستبهێنێت.
Additional Images
