ئەم توێژینەوەیە ئامانجی شیکردنەوەی کاریگەرییەکانی گەشەی خێرای شارنشینی و فراوانبوونی شاری سۆرانە، لەسەر گۆڕانکارییەکانی بەکارهێنانی زەوی و ڕووپۆشی ڕووەکی لە ماوەی نێوان ساڵانی (٢٠٠٥-٢٠٢٤). بۆ ئەم مەبەستە، میتۆدی تەکنیکەکانی هەستکردن لە دوورەوە (Remote Sensing) و سیستەمی زانیاری جوگرافی (QGIS, Google Earth Engine) بەکارهێنراون، لە ڕێگەی شیکردنەوەی وێنەی مانگە دەستکردەکانی Landsat 5 و Landsat 8 و بەکارهێنانی پێوەری NDVI. دەرئەنجامەکان دەریانخستووە کە لە ماوەی ١٩ ساڵدا، ناوچەی شارنشینی بە ڕێژەی ٢٦٪ زیادی کردووە، لە بەرامبەردا زەوییە کشتوکاڵییەکان بە ڕێژەی ٣٤.٨٪ و ڕووپۆشی ڕووەکی بە ڕێژەی ١٩.٦٪ کەمیان کردووە. توێژینەوەکە دەیسەلمێنێت کە فراوانبوونی ئاسۆیی شار لەسەر حیسابی زەوییە بەپیتەکان بووە، ئەمەش هەڕەشەیەکی ڕاستەوخۆیە بۆ سەر ئاسایشی خۆراک و هاوسەنگی ژینگەیی ناوچەکە. لە کۆتاییدا، توێژینەوەکە پێشبینی دەکات کە ئەگەر ئەم ڕەوتە بەردەوام بێت، تا ساڵی ٢٠٤٠ ناوچەکە ڕووبەڕووی لەناوچوونی تەواوەتی ڕووپۆشی ڕووەکی سروشتی دەبێتەوە. ووشەکلیلیەکان: گەشەی شارنشینی، بەکارهێنانی زەوی، ڕووپۆشی ڕووەکی، GIS، NDVI.
